સુરતમાં કાપડ વેપારીઓને 62 લાખથી વધુની છેતરપિંડી: મહાલક્ષ્મી એન્ટરપ્રાઇઝ સામે ગુનો દાખલ

સુરતના કાપડ ઉદ્યોગમાં વેપારીઓને નિશાન બનાવી છેતરપિંડી આચરતી ટોળકીનો વધુ એક કિસ્સો સામે આવ્યો છે. માંગરોળ અને પીપોદરા વિસ્તારના ત્રણ કાપડ વેપારીઓ પાસેથી કુલ 62.78 લાખથી વધુની કિંમતનું ગ્રે કાપડ ખરીદ્યા બાદ પેમેન્ટ ચૂકવ્યા વગર ફરાર થઈ જવાનો આક્ષેપ થયો છે. આ મામલે મહાલક્ષ્મી એન્ટરપ્રાઇઝના પ્રોપ્રાઇટર નરેશ કાતરીયા, વહીવટદાર મુકેશ વાણીયા અને દલાલ ભુપત કથીરીયા સામે પાલોદ પોલીસે ગુનો નોંધી તપાસ હાથ ધરી છે.

માંગરોળના લીંડીયાદ સીમ વિસ્તારમાં પૂજા ફેબ્રિક્સ ચલાવતા હરજીભાઈ સવજીભાઈ ખાંભડીયાનો સંપર્ક દલાલ ભુપત કથીરીયા મારફતે મહાલક્ષ્મી એન્ટરપ્રાઇઝના નરેશ કાતરીયા સાથે થયો હતો. શરૂઆતમાં નાના સોદાઓમાં સમયસર પેમેન્ટ કરીને વિશ્વાસ કેળવવામાં આવ્યો હતો. ત્યારબાદ 45 દિવસમાં પેમેન્ટ ચૂકવી દેવાની ખાતરી આપવામાં આવી હતી. જો પેમેન્ટમાં વિલંબ થાય તો માસિક 1.5 ટકાના દરે ચાર્જ ચૂકવવાની લાલચ પણ આપવામાં આવી હોવાનું ફરિયાદમાં જણાવાયું છે.