રાજકોટ: મુંબઈ ક્રાઈમ બ્રાંચના અધિકારી બની ઠગોએ વૃદ્ધ દંપતી પાસેથી 55 લાખ રૂપિયા પડાવ્યા

રાજકોટના પંચનાથ પ્લોટ વિસ્તારમાં રહેતા એક વૃદ્ધ દંપતી સાથે મોટી છેતરપિંડીનો કિસ્સો સામે આવ્યો છે. ઠગ ટોળકીએ પોતાને મુંબઈ ક્રાઈમ બ્રાંચના અધિકારીઓ ગણાવીને વૃદ્ધ દંપતીને સાત દિવસ સુધી સતત ડરાવી ધમકાવીને 'ડિજિટલ અરેસ્ટ'માં રાખ્યા હતા.

આરોપીઓએ વૃદ્ધ દંપતીને વિશ્વાસમાં લેવા માટે બનાવટી RBIના દસ્તાવેજો પણ મોકલી આપ્યા હતા. આ દસ્તાવેજો બતાવીને તેમણે દંપતીને જણાવ્યું હતું કે તેમના નાણાકીય વ્યવહારોમાં ગંભીર સમસ્યાઓ છે અને તેમને કાયદાકીય કાર્યવાહીનો સામનો કરવો પડી શકે છે. આ ડરનો લાભ ઉઠાવીને ઠગોએ દંપતી પાસેથી અલગ-અલગ સમયે લગભગ 55 લાખ રૂપિયા ટ્રાન્સફર કરાવી લીધા હતા.

આ સમગ્ર ઘટનામાં સાયબર ક્રાઈમની ગંભીર બેદરકારી સામે આવી રહી છે. વૃદ્ધ દંપતીએ તાત્કાલિક પોલીસનો સંપર્ક કર્યો હતો અને ફરિયાદ નોંધાવી હતી. પોલીસે ગુનો નોંધીને વધુ તપાસ હાથ ધરી છે અને આરોપીઓને ઝડપી પાડવાના પ્રયાસો શરૂ કર્યા છે.