અમદાવાદના પાલડીમાં સ્પામાં આગ: 5 લોકોને સુરક્ષિત બહાર કઢાયા

અમદાવાદ શહેરના પાલડી વિસ્તારમાં કોચરબ આશ્રમ પાસે આવેલી એક સ્પામાં અચાનક આગ લાગવાની ઘટના બની હતી. આગ લાગતાની સાથે જ સ્પામાં હાજર લોકોમાં અફરાતફરી મચી ગઈ હતી. ઘટનાની જાણ થતાં જ ફાયર બ્રિગેડની ટીમ તાત્કાલિક ઘટના સ્થળે પહોંચી ગઈ હતી.

ફાયર બ્રિગેડના જવાનોએ ભારે જહેમત બાદ આગ પર કાબૂ મેળવ્યો હતો. આ દુર્ઘટનામાં કુલ 5 લોકોને સુરક્ષિત રીતે બહાર કાઢવામાં આવ્યા હતા. બચાવવામાં આવેલા લોકોમાં 3 મહિલાઓ અને 2 પુરુષોનો સમાવેશ થાય છે.

આગ લાગવાનું ચોક્કસ કારણ હજુ સુધી જાણી શકાયું નથી. ફાયર વિભાગ દ્વારા આગ લાગવાના કારણની તપાસ હાથ ધરવામાં આવી છે. સદનસીબે, આ ઘટનામાં કોઈ જાનહાનિ થઈ નથી.