મુંબઈ-અમદાવાદ એક્સપ્રેસ વે પર કાર-ડમ્પર વચ્ચે ગમખ્વાર અકસ્માત, 4 લોકોના મોત

મુંબઈ-અમદાવાદ એક્સપ્રેસ વે પર સુરતના કામરેજ તાલુકાના દિગસ ગામની હદમાં તાપી બ્રિજ નજીક એક ગમખ્વાર અકસ્માત સર્જાયો છે. એક ડમ્પરમાં ટેક્નિકલ ખામી સર્જાતાં અને એર આવી જતાં ડ્રાઈવરે વાહન રસ્તાની સાઈડમાં ઊભું રાખ્યું હતું. આ દરમિયાન, મુંબઈથી પાટણ જઈ રહેલી એક હેરિયર કાર પૂરપાટ ઝડપે આવી રહી હતી અને તેણે ઊભેલા ડમ્પર પાછળ જોરદાર ટક્કર મારી હતી.

આ ભયાનક અકસ્માતમાં કારનો કચ્ચરઘાણ વળી ગયો હતો. કારમાં સવાર તમામ 4 લોકોના ઘટનાસ્થળે જ દુઃખદ મોત નીપજ્યા હતા. અકસ્માત એટલો ગંભીર હતો કે કારના અવશેષો ચારેય તરફ વેરવિખેર થઈ ગયા હતા.

ઘટનાની જાણ થતાં જ જિલ્લા ટ્રાફિક પોલીસ તાત્કાલિક ઘટનાસ્થળે પહોંચી ગઈ હતી. પોલીસે મૃતદેહોને કબજે લઈને પોસ્ટમોર્ટમ માટે સરકારી હોસ્પિટલમાં ખસેડવાની કાર્યવાહી હાથ ધરી હતી. પોલીસે વાહનવ્યવહારને પુનઃસ્થાપિત કરવા માટે પણ તાત્કાલિક પગલાં લીધા હતા અને ટ્રાફિકને ખુલ્લો કરાવ્યો હતો.