માંડવીની બેંક કર્મચારી સાથે રૂ. 3.73 લાખની સાયબર છેતરપિંડી

માંડવી તાલુકાના એક ગામમાં રહેતી અને બેંકમાં નોકરી કરતી એક મહિલા સોશિયલ મીડિયા પર અજાણ્યા વ્યક્તિ સાથે મિત્રતા કરવી ભારે પડી છે. સાયબર ઠગબાજોએ લંડનથી મોંઘી ગિફ્ટ મોકલવાની લાલચ આપીને મહિલાને વિશ્વાસમાં લીધી હતી.

ઠગબાજોએ અલગ-અલગ બહાના કાઢીને મહિલા પાસેથી કુલ રૂ. 3.73 લાખની રકમ પડાવી લીધી હતી. આ સમગ્ર ઘટના બાદ મહિલાને પોતાની સાથે છેતરપિંડી થઈ હોવાનું ધ્યાનમાં આવતા તેણે માંડવી પોલીસ સ્ટેશનમાં ફરિયાદ નોંધાવી છે.

પોલીસે સાયબર ક્રાઇમનો ગુનો નોંધી વધુ તપાસ હાથ ધરી છે. આ ઘટના સોશિયલ મીડિયા પર અજાણ્યા લોકો સાથે મિત્રતા કરતા પહેલા સાવચેત રહેવાની જરૂરિયાત દર્શાવે છે.