કીમમાં રખડતાં ઢોરની અડફેટે 25 વર્ષીય યુવકનું મોત, 48 કલાકમાં 4 ગંભીર અકસ્માતો

સ્થાનિક વહીવટી તંત્રની ઉપેક્ષા અને રખડતાં ઢોરના બેફામ ત્રાસે કીમ ગામના 25 વર્ષીય હોનહાર યુવકનો ભોગ લીધો છે. ગુરુવારે સાંજના સમયે રખડતા પશુની અડફેટે આવી ગંભીર રીતે ઘવાયેલા કેતન સોલંકી નામના યુવકે હોસ્પિટલમાં વેન્ટિલેટર પર 3 દિવસ સુધી મરણિયા સંઘર્ષ બાદ આખરે દમ તોડી દીધો છે.

ગરીબ પરિવારના એકમાત્ર આધારસ્તંભ અને કમાઉ પુત્રના અકાળે મોતના સમાચાર મળતાં જ સમગ્ર પંથકમાં શોકનું મોજું ફરી વળ્યું છે અને પરિવાર પર આભ તૂટી પડ્યું છે.

કીમ અને તેની આસપાસ રખડતાં પશુઓ રોડ પર મોત બનીને ફરી રહ્યાં છે. ચોંકાવનારી બાબત એ છે કે છેલ્લા સપ્તાહમાં માત્ર બુધવાર અને ગુરુવાર એમ 48 કલાકની અંદર જ ઢોરોને કારણે 4 જેટલા ગંભીર અકસ્માતો સર્જાયા હતા. આટલા બનાવો છતાં ગ્રામ પંચાયત કે જિલ્લા વહીવટી તંત્ર કુંભકર્ણની નિંદ્રામાંથી ન જાગતાં આખરે વધુ એક નિર્દોષ યુવકે પોતાનો જીવ ગુમાવવો પડ્યો છે.