મહિસાગર જિલ્લામાં 2.15 કરોડના વિદેશી દારૂનો નાશ

મહિસાગર જિલ્લામાં પ્રોહિબિશનના વિવિધ કેસોમાં ઝડપાયેલા વિદેશી દારૂનો નાશ કરવામાં આવ્યો છે. જિલ્લાના કુલ 7 પોલીસ મથકમાં જપ્ત કરાયેલા વિદેશી દારૂના જથ્થા પર બુલડોઝર ફેરવી નાશ કરવામાં આવ્યો હતો.

લુણાવાડા ટાઉન, લુણાવાડા તાલુકા, કોઠંબા, બાકોર, બાલાસિનોર ટાઉન, બાલાસિનોર તાલુકા અને વિરપુર પોલીસ સ્ટેશનમાં જપ્ત કરાયેલા દારૂનો નાશ કરવામાં આવ્યો છે.

આ કાર્યવાહી દરમિયાન કુલ 63,609 બોટલ વિદેશી દારૂનો નાશ કરવામાં આવ્યો હતો. નાશ કરાયેલા વિદેશી દારૂની અંદાજિત કિંમત ₹2 કરોડ 15 લાખ હોવાનું સામે આવ્યું છે.

બાલાસિનોર અને લુણાવાડાના નાયબ કલેક્ટર, ડી.વાય.એસ.પી. તેમજ વિવિધ પોલીસ મથકના પોલીસ ઇન્સ્પેક્ટરો સહિતના અધિકારીઓની હાજરીમાં વિદેશી દારૂનો નાશ કરવામાં આવ્યો હતો.