પલસાણા પોલીસે બિહારમાંથી 21 વર્ષથી ફરાર હત્યાના આરોપીને ઝડપ્યો

સુરત જિલ્લાના પલસાણા પોલીસે હત્યા અને ફાયરિંગના ગુનામાં છેલ્લા 21 વર્ષથી ફરાર ચાલી રહેલા આરોપીને બિહારથી ઝડપી પાડ્યો છે. પકડાયેલા આરોપીનું નામ રામનરેશ ઉર્ફે રતન શાહુ છે, જેની સામે બિહાર, દિલ્હી અને ગુજરાતમાં કુલ 24 જેટલા ગંભીર ગુના નોંધાયેલા છે.

આરોપી રામનરેશ અને તેના સાથીઓ 12 ઓક્ટોબર, 2005ના રોજ પલસાણાના વરેલી ગામની સીમમાં ગેરકાયદે પ્રવેશ્યા હતા. ત્યાં તેમણે કુમુદકુમાર શાહ પર તમંચા વડે ફાયરિંગ કર્યું હતું. આ ગોળીબારમાં કુમુદકુમાર શાહને જમણા હાથ અને પાંસળીના ભાગે ગંભીર ઈજા પહોંચી હતી, જેના કારણે સારવાર દરમિયાન તેમનું દુઃખદ અવસાન થયું હતું.

આ ઘટના બાદથી પોલીસ આરોપી રામનરેશ શાહુને શોધી રહી હતી. લાંબા સમય બાદ, પલસાણા પોલીસે બાતમીના આધારે બિહારમાં દરોડો પાડી આરોપીને સફળતાપૂર્વક ઝડપી પાડ્યો છે. આ કાર્યવાહીથી પોલીસ રેકોર્ડ પરના અનેક ગુનાઓમાં આરોપીને સજા અપાવવાનો માર્ગ મોકળો થયો છે.