20 વર્ષીય યુવકનું મોત, બે સહકર્મીઓ ઘવાયા: વાવ જેટકો સબ-સ્ટેશન પર અકસ્માત

સોમવારે સવારે 8:12 વાગ્યે અમદાવાદ-મુંબઈ નેશનલ હાઈવે પર વાવ જેટકો સબ-સ્ટેશન નજીક એક બેફામ જેસીબી ચાલકે સર્જેલા ગમખ્વાર અકસ્માતમાં 20 વર્ષીય યુવકનું ઘટનાસ્થળે જ કમકમાટીભર્યું મોત નીપજ્યું હતું. બાઇક પર સવાર અન્ય બે સહકર્મીઓ ગંભીર રીતે ઘવાયાં હતાં.

જ્યારે જેસીબી ચાલક વાહનને ડિવાઇડર પરથી કૂદાવી સામેના રોંગ ટ્રેક પર હંકારી નાસી છૂટ્યો હતો, ત્યારે બાઇક સાથે ધડાકાભેર ટક્કર થઈ. છાતી અને માથામાં ગંભીર ઇજા પહોંચતાં રોહિતનું સ્થળ પર જ મોત થયું.

ખોલવડની આર.કે. કોલોનીમાં રહેતો રોહિત નરેશભાઈ મકવાણા (20) ફળિયામાં રહેતા સુજલ સુરેશભાઈ નાયકા અને નવાગામની રૂપાબેન અશોકભાઈ શીંદે (30) સાથે સ્પ્લેન્ડર બાઇક (GJ-05-UK-9949) પર મંકણા સ્થિત વાઇફાઇ કંપનીમાં નોકરીએ જઈ રહ્યો હતો.

ગંભીર રીતે ઘવાયેલાં રૂપાબેન અને સુજલને 108 એમ્બ્યુલન્સ મારફતે સુરતની સ્મીમેર હોસ્પિટલમાં ખસેડાયા. મૃતકના પિતાની ફરિયાદ આધારે કામરેજ પોલીસે ગુનો નોંધી તપાસ હાથ ધર્યું.