અમરેલી: સાવરકુંડલા રોડ રેલ્વે ફાટક 12 કલાક બંધ, વૈકલ્પિક માર્ગનો ઉપયોગ કરવા અપીલ

અમરેલી શહેરના સાવરકુંડલા રોડ પર આવેલા રેલ્વે ફાટક નંબર 24-C ને ઓવર હોલિંગ કામગીરી માટે બંધ રાખવામાં આવશે. પશ્ચિમ રેલ્વેના સિનિયર સેક્શન એન્જિનિયર (પી.વે) અમરેલી દ્વારા આપવામાં આવેલી માહિતી અનુસાર, આ કામગીરી આગામી 1લી ઓક્ટોબર, 2026 ના રોજ બુધવારની રાત્રે 9:00 વાગ્યાથી શરૂ થશે.

આ બંધ તા. 02/10/2026 ના રોજ ગુરુવારની સવારે 9:00 વાગ્યા સુધી, એટલે કે કુલ 12 કલાક સુધી યથાવત રહેશે. આ સમયગાળા દરમિયાન સાવરકુંડલા રોડ પર આવેલું ફાટક વાહન વ્યવહાર માટે સંપૂર્ણપણે બંધ રહેશે.

રેલ્વે ટ્રેકના સમારકામ અને ઓવર હોલિંગની કામગીરીને કારણે આ નિર્ણય લેવામાં આવ્યો છે. આ દરમિયાન તમામ વાહન ચાલકો અને નગરજનોને સહકાર આપવા તેમજ કોઈપણ અગવડતા ટાળવા માટે વૈકલ્પિક માર્ગનો ઉપયોગ કરવા માટે વિનંતી કરવામાં આવી છે.