સુરતમાં ફોરેક્સ ટ્રેડિંગના નામે 1.18 કરોડની છેતરપિંડી: ત્રણ આરોપીઓની ધરપકડ

સુરત શહેરમાં ફોરેક્સ ટ્રેડિંગમાં રોકાણ કરીને ટૂંકા ગાળામાં મોટો નફો કમાવવાની લાલચ આપી લાખો રૂપિયાની છેતરપિંડી કરતી એક ટોળકીનો પોલીસે પર્દાફાશ કર્યો છે. આ ટોળકીએ સૈયદપુરા વાવશેરી વિસ્તારમાં રહેતા અને જરીકામનો વ્યવસાય કરતા શૈલેષભાઈ કંચનલાલ રાણા સાથે 1.18 કરોડ રૂપિયાથી વધુની ઠગાઈ આચરી હોવાનું સામે આવ્યું છે.

પોલીસ તપાસમાં જાણવા મળ્યું છે કે આરોપીઓ કૃણાલ અશોકભાઈ રાણા, આદિત્ય નિલેશભાઈ ઠક્કર અને પિનલ વિજયભાઈ બારૈયાએ વર્ષ 2022થી એકબીજાની મિલીભગતથી આ ગુનાહિત કાવતરું ઘડ્યું હતું. તેમણે ફરિયાદી શૈલેષભાઈ રાણાને વિશ્વાસમાં લીધા હતા અને ફોરેક્સ માર્કેટમાં ઊંચું વળતર અપાવવાના ખોટા વાયદા કરી તેમની પાસેથી મોટી રકમ મેળવી હતી.

આરોપીઓએ ફરિયાદીને ફોરેક્સ ટ્રેડિંગમાં રોકાણ કરવા માટે સમજાવ્યા હતા અને શરૂઆતમાં થોડો નફો પણ બતાવ્યો હતો, જેના કારણે ફરિયાદીનો વિશ્વાસ વધુ દ્રઢ બન્યો હતો. ત્યારબાદ, તેમણે વધુ મોટી રકમનું રોકાણ કરવા માટે દબાણ કર્યું હતું અને અંતે તમામ નાણાં લઈને ફરાર થઈ ગયા હતા. પોલીસે આ ત્રણેય આરોપીઓની ધરપકડ કરી કાયદેસરની કાર્યવાહી હાથ ધરી છે.